शिक्षा र स्वास्थ्यको समता शुल्क खारेज गर्ने मन्त्रिपरिषद्को औपचारिक निर्णय (सूची सहित)
Prime TV News एक घण्टा अगाडि 
काठमाडौ । सरकारले शिक्षा र स्वास्थ्य क्षेत्रमा लागू गरिएको समता शुल्क खारेज गर्ने औपचारिक निर्णय गरेको छ।
बुधबार बसेको मन्त्रिपरिषद् बैठकले उक्त शुल्क खारेज गर्ने निर्णय गरेको हो। आर्थिक वर्ष २०८३/८४ को बजेटमार्फत घोषणा गरिएको समता शुल्क साउन १ गतेदेखि कार्यान्वयनमा आएको थियो। सरकारका प्रवक्ता तथा शिक्षामन्त्री सस्मित पोखरेलले मन्त्रिपरिषद् बैठकका मुख्य निर्णय सार्वजनिक गर्दै शिक्षा र स्वास्थ्य क्षेत्रमा लाग्दै आएको समता शुल्क खारेज गरिएको जानकारी दिए।
सरकारले यसअघि बजेटमार्फत शिक्षा र स्वास्थ्य सेवामा समता शुल्क लागू गरेको थियो। शुल्क कार्यान्वयन भएपछि विभिन्न राजनीतिक दल, निजी क्षेत्र तथा सरोकारवालाबाट त्यसको व्यापक आलोचना हुँदै आएको थियो।
मन्त्रिपरिषद्का निर्णयहरुः–
१. विशेष अदालतको अध्यक्ष पदमा उच्च अदालत तुलसीपुरका न्यायाधीश वासुदेव आचार्यलाई तोक्ने ।
२.श्रम अदालतको अध्यक्ष पदमा उच्च अदालत सुर्खेतका न्यायाधीश दिपेन्द्र अधिकारीलाई तोक्ने ।
३. गुठी संस्थानको प्रशासक पदमा शैलेन्द्रराज कुँवरलाई नियुक्ति गर्ने ।
४. २०८५ साल भदौ मसान्तसम्मको लागि पोखरा र गौतम बुद्ध अन्तर्राष्ट्रिय विमानस्थलबाट हुने अन्तर्राष्ट्रिय नियमित हवाई उडानमा पार्किङ, ल्यान्डिङ तथा नेभिगेसन शुल्क पूर्ण रूपमा छुट दिन र ग्राउन्ड ह्यान्डलिङ शुल्कमा ५० प्रतिशत छुट दिन स्वीकृति गर्ने ।
५. अनुचित लेनदेन (मिटरब्याज) बाट प्रभावित नागरिकको माग सम्बोधन गर्ने सम्बन्धमा गठित समिति र मिटरब्याज विरुद्ध किसान मजदुर आन्दोलनका प्रतिनिधि बीच मिति २०८३/०४/०१ मा भएको सम्झौता अनुमोदन गर्ने , सम्झौतामा उल्लेख भएबमोजिम मिटरब्याजरसँग सम्बन्धित फर्जी लिखतहरू आजकै मितिबाट अवैध घोषणा गर्ने ।
६. गणेश नेपालीको आत्महत्या घटनाको सम्बन्धमा सत्यतथ्य पत्ता लगाउन उच्च अदालतका पूर्व न्यायाधीश केशवप्रसाद बाँस्तोलाको अध्यक्षतामा न्यायिक समिति गठन गर्ने ।
७. आर्थिक ऐन २०८३ को दफा १८ को उपदफा १ बमोजिम शिक्षा समता शुल्क र स्वास्थ्य समता शुल्क पूर्ण रूपमा छुट दिने ।
