युक्रेनको व्यापक ड्रोन आक्रमण, रुसमा नौ जनाको मृत्यु

Prime TV News २ दिन अगाडि

काठमाडौ । युक्रेनले रुसका विभिन्न क्षेत्रमा व्यापक ड्रोन आक्रमण गरेको छ।

रुसी अधिकारीहरूका अनुसार रातभरि र शनिबार दिउँसो भएका आक्रमणमा कम्तीमा नौ जनाको मृत्यु भएको छ भने ८० भन्दा बढी घाइते भएका छन्। आक्रमणका क्रममा मस्को क्षेत्र र ताम्बोभ क्षेत्रमा रहेका दुई ठूला गोदाम तथा नोगिन्स्कस्थित एक तेल डिपोलाई निशाना बनाइएको बताइएको छ।

तेल डिपोमा भएको आक्रमणपछि ठूलो आगलागी भएको र सुरक्षाका लागि नजिकैको प्रसूति अस्पताल तथा आवासीय भवन खाली गराइएको स्थानीय अधिकारीहरूले जनाएका छन्। ताम्बोभ क्षेत्रका अधिकारीहरूका अनुसार कोतोभस्कस्थित गोदाममा रातिको सिफ्टमा कार्यरत सात कर्मचारीको मृत्यु भएको छ भने २५ जना घाइते भएका छन्।

मस्को क्षेत्रमा थप एक जनाको मृत्यु भएको र ६१ जना घाइते भएका छन्। बेलगोरोड क्षेत्रमा भएको अर्को ड्रोन आक्रमणमा पनि एक जनाको ज्यान गएको स्थानीय प्रशासनले जनाएको छ। युक्रेनी राष्ट्रपति भोलोदिमिर जेलेन्स्कीले मस्को र ताम्बोभ क्षेत्रमा रहेका महत्त्वपूर्ण लजिस्टिक केन्द्र तथा एक तेल प्रशोधन केन्द्रलाई सफलतापूर्वक निशाना बनाइएको दाबी गरेका छन्।

उनका अनुसार ती संरचनाहरू रुसको सैन्य तथा ड्रोन उत्पादन प्रणालीसँग सम्बन्धित आपूर्ति सञ्जालका लागि प्रयोग हुँदै आएका थिए। युक्रेनको जनरल स्टाफले नोगिन्स्कस्थित इन्धन डिपो रुसी सेनाको प्रमुख इन्धन आपूर्ति केन्द्र रहेको दाबी गर्दै ब्ल्याक सागर र आजोभ सागर क्षेत्रमा रहेका केही रुसी जलयानलाई पनि निशाना बनाइएको जनाएको छ।

यता, रुसी रक्षा मन्त्रालयले आफ्नो हवाई रक्षा प्रणालीले रातभर १९ वटा क्षेत्र, अवैध रूपमा गाभिएको क्रिमिया तथा काला र आजोभ सागरको आकाशमा उडेका ३७९ युक्रेनी ड्रोन खसालिएको दाबी गरेको छ। युद्ध जारी रहँदा दुवै पक्षले एकअर्काको सैन्य, ऊर्जा तथा आपूर्ति पूर्वाधारमाथि आक्रमणलाई तीव्र बनाएका छन्, जसले द्वन्द्व थप जटिल बन्दै गएको संकेत गरेको छ।