आन्दोलनको दबाबपछि सर्बियाका राष्ट्रपति भुचिचले राजीनामा घोषणा

Prime TV News ३ हप्ता अगाडि

काठमाडौ । सन् २०२४ को नोभेम्बरदेखि जारी विद्यार्थी नेतृत्वको सरकारविरोधी आन्दोलनको दबाबबीच सर्बियाका राष्ट्रपति आलेक्सान्दार भुचिचले आगामी केही साताभित्र पदबाट राजीनामा दिने घोषणा गरेका छन्।

राजधानी बेलग्रेडमा आयोजित सत्तारूढ पक्षको एक कार्यक्रममा सम्बोधन गर्दै राष्ट्रपति भुचिचले आफू अब केही हप्ता मात्र पदमा रहने र त्यसपछि राजीनामा दिएर देशलाई मध्यावधि राष्ट्रपतीय तथा संसदीय निर्वाचनतर्फ लैजाने बताएका हुन्।

सर्बियाको उत्तरी सहर नोभी सादस्थित रेलवे स्टेसनको क्यानोपी भत्किँदा १६ जनाको मृत्यु भएपछि सुरु भएको आन्दोलन पछिल्लो डेढ वर्षदेखि निरन्तर जारी छ। आन्दोलनकारी विद्यार्थी, विपक्षी दल र नागरिक समाजले उक्त दुर्घटनालाई सरकारी लापरबाही, कमजोर निर्माण व्यवस्थापन र संस्थागत भ्रष्टाचारको परिणाम भन्दै सरकारको आलोचना गर्दै आएका छन्।

यसअघि प्रदर्शनकारीलाई ‘विदेशी एजेन्ट’को संज्ञा दिएका भुचिचले सन् २०२७ मा कार्यकाल सकिनुअघि निर्वाचन नहुने अडान लिएका थिए। तर आन्दोलनको चर्को दबाबपछि उनले अन्ततः आफ्नो निर्णय परिवर्तन गरेका हुन्।

सर्बियाको संविधानअनुसार दोस्रो कार्यकाल पूरा गर्दै रहेका भुचिच पुनः राष्ट्रपतिको उम्मेदवार बन्न पाउने छैनन्। यद्यपि, राजनीतिक विश्लेषकहरूले उनको राजीनामालाई राजनीतिबाट बहिर्गमनभन्दा पनि नयाँ सत्ता रणनीतिको रूपमा व्याख्या गरेका छन्।