डीआर कंगोलाई हराउँदै कोलम्बिया नकआउट चरणमा, पोर्चुगल दोस्रो स्थानमा झर्यो
Prime TV News ३ हप्ता अगाडि 
काठमाडौ । कोलम्बियाले फिफा विश्वकप २०२६ अन्तर्गत समूह ‘के’ मा लगातार प्रभावशाली प्रदर्शन गर्दै नकआउट चरणमा स्थान सुरक्षित गरेको छ। बुधबार सम्पन्न खेलमा डीआर कंगोलाई १–० ले पराजित गरेपछि कोलम्बिया समूह विजेताका रूपमा अन्तिम ३२ मा प्रवेश गरेको हो।
कडा प्रतिस्पर्धाबीच सम्पन्न खेलमा कोलम्बियालाई जित दिलाउने एकमात्र गोल डेनियल मुनोजले गरेका थिए। उनले खेलको ७६औँ मिनेटमा निर्णायक गोल गर्दै टोलीलाई महत्वपूर्ण तीन अंक दिलाए। जितसँगै कोलम्बियाले समूह ‘के’ को शीर्षस्थान कब्जा गरेको छ। समूह चरणका दुई खेलपछि कोलम्बियाले उत्कृष्ट लय कायम राख्दै नकआउट चरणको यात्रा सुनिश्चित गरेको हो।
यस नतिजाले समूहको समीकरणमा पनि परिवर्तन ल्याएको छ। यसअघि शीर्ष स्थानका दाबेदार मानिएको पोर्चुगल चार अंकसहित दोस्रो स्थानमा झरेको छ। पोर्चुगलले पहिलो खेलमा डीआर कंगोसँग बराबरी खेलेको थियो भने दोस्रो खेलमा उज्बेकिस्तानमाथि प्रभावशाली जित निकालेको थियो।
अब समूह ‘के’ को अन्तिम खेलमा कोलम्बिया र पोर्चुगल आमनेसामने हुनेछन्। उक्त खेलले समूह विजेताको अन्तिम टुंगो लगाउनेछ भने दुवै टोली नकआउट चरणका लागि तयारीमा रहनेछन्। डेनियल मुनोजको निर्णायक गोलसँगै कोलम्बियाले विश्वकपमा आफ्नो दाबेदारी बलियो बनाएको छ भने डीआर कंगोको नकआउट चरण पुग्ने सम्भावना थप कठिन बनेको छ।
