मेसी विश्वकप इतिहासकै सर्वाधिक गोलकर्ता, अर्जेन्टिनालाई ऐतिहासिक जित
Prime TV News ४ हप्ता अगाडि 
काठमाडौ । अर्जेन्टिनाका कप्तान लियोनल मेसीले फिफा विश्वकप इतिहासमा नयाँ कीर्तिमान कायम गरेका छन्।
अमेरिकाको टेक्ससस्थित डलास स्टेडियममा सोमबार राति सम्पन्न समूह ‘जे’ अन्तर्गत अस्ट्रियाविरुद्धको खेलमा दुई गोल गर्दै उनले विश्वकप इतिहासकै सर्वाधिक गोलकर्ताको उपलब्धि आफ्नो नाममा लेखाएका हुन्।
३८ वर्षीय मेसीले खेलको ३८औँ मिनेटमा टोलीलाई अग्रता दिलाउने गोल गरे। त्यसपछि इन्जुरी समयको थप गरिएको समयमा अर्को गोल थप्दै उनले विश्वकपमा आफ्नो कुल गोल सङ्ख्या १८ पुर्याए।
यो उपलब्धिसँगै मेसीले ब्राजिलकी महिला फुटबलकी महान खेलाडी मार्ताको १७ गोलको विश्व कीर्तिमानलाई उछिन्दै पुरुष र महिला दुवै विश्वकप इतिहासमा सबैभन्दा धेरै गोल गर्ने खेलाडी बने।
यसअघि अल्जेरियाविरुद्धको खेलमा ह्याट्रिक गर्दै उनले जर्मनीका मिरोस्लाभ क्लोजको १६ गोलको कीर्तिमान बराबरी गरेका थिए। अस्ट्रियाविरुद्ध भने उनले सुरुवाती समयमा पेनाल्टी अवसर गुमाएका थिए, तर त्यसपछि उत्कृष्ट पुनरागमन गर्दै इतिहास रचे।
सन् २००६ मा पहिलो पटक विश्वकप खेलेका मेसीले अर्जेन्टिनाका लागि २०१ खेलमा १२१ गोल पूरा गरिसकेका छन्। उनी लगातार छ वटा विश्वकपमा गोल गर्ने दुर्लभ खेलाडीमध्ये पनि परेका छन्।
चोट र व्यक्तिगत चुनौतीबीच पनि मेसीको प्रदर्शन उच्च स्तरमा कायम रहेको छ। ह्यामिस्ट्रिङको समस्याका बाबजुद मैदान उत्रिएका उनले टोलीलाई निर्णायक योगदान दिए। खेलपछि टोलीका मिडफिल्डर एलेक्सिस म्याक एलिस्टारले मेसी टोलीका सबैभन्दा महत्त्वपूर्ण खेलाडी रहेको प्रतिक्रिया दिएका छन्।
हाल अमेरिकी क्लब इन्टर मायमीबाट व्यावसायिक फुटबल खेलिरहेका मेसीले विश्वकप खेल्ने विषय अन्तिम समयसम्म खुलाएका थिएनन्। तर साविक विजेता अर्जेन्टिनाको नेतृत्व फेरि उनैले सम्हाल्ने विश्वास सुरुदेखि नै कायम थियो।
विश्वकप सर्वकालीन गोलकर्ताको सूचीमा अहिले मेसी शीर्ष स्थानमा पुगेका छन्। त्यसपछि मिरोस्लाभ क्लोज १६ गोलसहित दोस्रो, ब्राजिलका रोनाल्डो १५ गोलसहित तेस्रो तथा जर्मनीका गर्ड मुलर र फ्रान्सका किलियन एम्बाप्पे १४–१४ गोलसहित संयुक्त रूपमा चौथो स्थानमा रहेका छन्।
अस्ट्रियामाथिको जितसँगै अर्जेन्टिनाको अर्को चरण पुग्ने सम्भावना थप बलियो बनेको छ।
