सांसद रमेश मल्लको आरोप : बजेटमा कर्णाली प्रदेशमाथि उपेक्षा

Prime TV News २ घण्टा अगाडि

काठमाडौ । नेकपा सांसद रमेश मल्लले सरकारले सार्वजनिक गरेको आगामी आर्थिक वर्षको बजेटले कर्णाली प्रदेशलाई अपेक्षित प्राथमिकता नदिएको आरोप लगाएका छन्।

मंगलबार प्रतिनिधिसभामा बजेटमाथिको छलफलमा भाग लिँदै उनले प्रधानमन्त्री बालेन्द्र शाहले कर्णालीका जनप्रतिनिधिहरूसँगको छलफलमा प्रदेशलाई बजेटमा अन्याय नहुने प्रतिबद्धता जनाएको स्मरण गराए। तर प्रस्तुत बजेटमा त्यो प्रतिबद्धता कार्यान्वयन नभएको उनको भनाइ थियो।

सांसद मल्लले कर्णालीका विकास आवश्यकताअनुसार बजेट विनियोजन हुनुपर्ने अपेक्षा रहे पनि वास्तविक बजेटमा त्यसको प्रतिबिम्ब नदेखिएको बताए। उनले यस विषयमा सरकारको गम्भीर ध्यानाकर्षण गराए। उनले सत्तारुढ राष्ट्रिय स्वतन्त्र पार्टी (रास्वपा) ले जनप्रतिनिधिहरू मन्त्रालय–मन्त्रालय धाएर बजेट माग्नुपर्ने अवस्था अन्त्य गर्ने वाचा गरे पनि व्यवहारमा त्यस्तो नदेखिएको टिप्पणी गरे।

मल्लका अनुसार बजेट निर्माणका क्रममा कर्णालीका जनप्रतिनिधिहरूले पूर्वाधार विकास मन्त्रालयमा पुगेर प्रदेशका प्राथमिकतामा रहेका तीनवटा सडक आयोजनाको सिफारिस गरेका थिए। मन्त्रालयले सुझाव मागेपछि आफूहरू योजनासहित पुगेको भए पनि अन्ततः तीमध्ये कुनै पनि योजना बजेटको “रातो किताब” मा समावेश नभएको उनले बताए।

उनले मन्त्रालयबाट सकारात्मक आश्वासन पाए पनि अन्तिम बजेटमा ती योजनाहरू समावेश नभएको भन्दै असन्तुष्टि व्यक्त गरे। उनका अनुसार यसले कर्णालीका विकास आवश्यकताप्रति सरकारको प्रतिबद्धतामाथि प्रश्न उठाएको छ। प्रतिनिधिसभामा बजेटमाथिको छलफल जारी रहेकाले प्रदेशगत बजेट वितरण, पूर्वाधार आयोजना तथा क्षेत्रीय सन्तुलनका विषयमा आगामी दिनमा थप बहस हुने अपेक्षा गरिएको छ।