अमेरिकामा बी–५२ बम्बर दुर्घटना : परीक्षण उडानका क्रममा आठ जनाको ज्यान गयो

Prime TV News ३ घण्टा अगाडि

काठमाडौ । अमेरिकाको क्यालिफोर्निया स्थित एडवर्ड्स एयर फोर्स बेस मा अमेरिकी वायुसेनाको बी–५२ बम्बर विमान दुर्घटनामा परेको छ। दुर्घटनाका क्रममा विमानमा रहेका सबै आठ जनाको मृत्यु भएको पुष्टि गरिएको छ।

अमेरिकी वायुसेनाका अनुसार विमान नियमित परीक्षण उडानमा रहेको थियो। स्थानीय समयअनुसार बिहान करिब ११:२० बजे टेकअफ गरेको केही समयमै विमान धावनमार्ग क्षेत्रमै खसेको र त्यसपछि आगलागी भएको थियो। प्रारम्भिक अवस्थामै उद्धार टोलीले दुर्घटना बाँच्न नसकिने प्रकृतिको रहेको जनाएको थियो।

दुर्घटनामा वायुसेनाका सदस्यसँगै सरकारी प्राविधिक, परीक्षण कार्यक्रममा संलग्न विशेषज्ञ तथा ठेकेदार कम्पनीका प्रतिनिधिहरू पनि रहेका बताइएको छ। केही विवरणअनुसार विमान राडार आधुनिकीकरण कार्यक्रमसँग सम्बन्धित परीक्षण उडानमा प्रयोग भइरहेको थियो।

हालसम्म दुर्घटनाको आधिकारिक कारण सार्वजनिक गरिएको छैन। विमानको नियन्त्रण प्रणाली, परीक्षण उपकरण वा अन्य प्राविधिक पक्षलाई केन्द्रमा राखेर अनुसन्धान सुरु गरिएको अमेरिकी अधिकारीहरूले बताएका छन्। अनुसन्धान प्रक्रिया पूरा हुन केही महिना लाग्न सक्ने अनुमान गरिएको छ।

दुर्घटनापछि एयरबेसको उडान सञ्चालन अस्थायी रूपमा रोकिएको थियो भने त्यहाँ आउने अन्य विमानहरू वैकल्पिक एयरबेसतर्फ पठाइएको थियो।