घरेलु मैदानमा अमेरिकाको दमदार सुरुआत, पाराग्वेमाथि ४–१ को प्रभावशाली जित

Prime TV News २ घण्टा अगाडि

काठमाडौ । फिफा विश्वकप २०२६ को पहिलो खेलमा आयोजक अमेरिकाले शानदार प्रदर्शन गर्दै पाराग्वेमाथि ४–१ को फराकिलो जित निकालेको छ।

घरेलु समर्थकमाझ खेलिएको उद्घाटन प्रतिस्पर्धामा अमेरिकाले आक्रामक खेल प्रस्तुत गर्दै प्रतियोगितामा बलियो सुरुआत गरेको हो।

३२ वर्षपछि आफ्नै भूमिमा विश्वकप खेलिरहेको अमेरिकाले सुरुवातदेखि नै खेलमा नियन्त्रण कायम गर्‍यो। खेलको सातौं मिनेटमै अमेरिकाले अग्रता लियो।

वेस्टन म्याकेनीको पास क्लियर गर्ने क्रममा पाराग्वेका डिफेन्डर डेनियस बोबाडिलाबाट आत्मघाती गोल भएपछि घरेलु टोली अघि बढेको थियो।

त्यसपछि ३१औं मिनेटमा फ्लोरियन बलोगुनले अमेरिकाको अग्रता दोब्बर बनाए। पहिलो हाफको अतिरिक्त समयमा उनले व्यक्तिगत दोस्रो गोल गर्दै अमेरिकालाई ३–० को सहज अवस्थामा पुर्‍याए।

बलोगुनको यो प्रदर्शन ऐतिहासिक पनि बन्यो। उनी विश्वकपमा अमेरिकाका लागि एकै खेलमा दुई गोल गर्ने दोस्रो खेलाडी बने। यसअघि सन् १९३० मा बर्ट प्याटनुडेले यस्तो उपलब्धि हासिल गरेका थिए।

दोस्रो हाफमा पाराग्वेले खेलमा फर्कने प्रयास गर्‍यो। ७३औं मिनेटमा मौरिकोले गोल गर्दै अन्तर घटाए पनि त्यो पर्याप्त हुन सकेन। खेलको अन्तिम क्षणमा जियोभानो रेनाले थप गोल गरेपछि अमेरिकाले ४–१ को प्रभावशाली जित सुनिश्चित गर्‍यो।

यो जितसँगै आयोजक अमेरिकाले विश्वकप अभियानलाई आत्मविश्वासका साथ अघि बढाएको छ भने पाराग्वे दबाबमा परेको छ।