राष्ट्रिय खेलकुद परिषदले अखिल नेपाल फुटबल संघ (एन्फा) लाई सोध्यो २४ घण्टाभित्र स्पष्टीकरण

Prime TV News १ हप्ता अगाडि

काठमाडौ । नेपालमा फुटबल प्रशासनसँग सम्बन्धित विवाद फेरि चर्किएको छ। राष्ट्रिय खेलकुद परिषदले अखिल नेपाल फुटबल संघ (एन्फा) लाई २४ घण्टाभित्र स्पष्टीकरण दिन निर्देशन दिएको छ।

राखेपका अनुसार एन्फाले प्रचलित नियम र निर्देशन पालना नगरी निर्वाचन प्रक्रिया अघि बढाएको छ। परिषदका खेलकुद विकास विभाग प्रमुख सरोजकुमार पोखरेलले मंगलबार पत्र पठाउँदै छिटो सफाइ पेश गर्न भनेका हुन्। यसअघि बसेको कार्यकारी समितिको बैठकले पनि एन्फासँग स्पष्टीकरण माग्ने निर्णय गरेको थियो।

एन्फाले भने आगामी चैत १३ गते झापामा साधारण सभा मार्फत नयाँ केन्द्रीय कार्यसमिति चयन गर्ने तयारी गरिरहेको छ। तर राखेपले उक्त निर्वाचनलाई स्वीकृति दिएको छैन। साथै, पहिले विधान संशोधन गर्न निर्देशन दिएको भए पनि एन्फाले त्यसलाई बेवास्ता गरेको आरोप लागेको छ।

एन्फाको तर्क भने फरक छ। उसले अन्तर्राष्ट्रिय फुटबल निकायबाट स्वीकृति पाएको अवस्थामा निर्वाचन रोक्न नमिल्ने बताउँदै आएको छ। यही कारणले दुवै निकायबीच विवाद बढ्दै गएको छ।अर्कोतर्फ, एन्फाले जिल्लास्तरबाट प्रक्रिया अघि नबढाई सिधै केन्द्रीय कार्यसमितिको निर्वाचन गर्न लागेको भन्दै पनि आलोचना भइरहेको छ। यसलाई राखेपले कानुन विपरीत ठहर गरेको छ।

उक्त निर्वाचनमा वर्तमान अध्यक्ष पंकजबिक्रम नेम्बाङ र उपाध्यक्ष दीर्घबहादुर केसी बीच प्रतिस्पर्धा हुने बताइएको छ। हालको कार्यसमितिको कार्यकाल असार ६ गते सकिने भएकाले त्यसअघि नै नयाँ नेतृत्व चयन गर्ने तयारी भइरहेको छ। अब एन्फाले दिने स्पष्टीकरणपछि यो विवाद कुन दिशामा जाने भन्ने चासो बढेको छ।