पुनले अर्याललाई पुरानो राजनीतिक संस्कारको बोझ बोक्दै अहंकार प्रदर्शन नगर्न सुझाव दिँदै अहिलेको पुस्ताले पुराना नेताहरूभन्दा धेरै जान्ने, चलाख र जिम्मेवार हुने दाबी गरे। उनले लेखे, 'तिमीहरूले नयाँ नेताहरूलाई तह लगाउने कुरा गर्नु अगाडि, अहिलेका युवाले पुराना सोच भएका नेताहरूलाई कसरी पराजित गर्ने भन्ने तरिका राम्ररी सिकिसकेका छन्।'

गत आम निर्वाचनले पुरानो राजनीतिक शैलीमाथि जनताले कडा असन्तोष देखाइसकेको उल्लेख गर्दै पुनले अर्यालको बुझाइ नै पछाडि परिरहेको टिप्पणी गरे। उनले अर्याल समानुपातिक कोटाबाट आएका नेतामा पर्ने भन्दै ‘चाकरी र निष्ठा’को आधारमा राजनीतिमा टिकेको आरोप पनि लगाए।

पुनले लेखे, 'समानुपातिक सूचीमा चाकरी गरेर आएको मान्छेले यति ठूलो अहंकार देखाउनु शोभनीय छैन। अहंकार त्यागेर विवेकपूर्ण सहकार्य गर्न सिक'

विगत ३५ वर्षमा विश्वले भोगेका परिवर्तनहरू उल्लेख गर्दै पुनले २०४६ सालको मानसिकता लिएर आजको राजनीतिमा प्रतिस्पर्धा गर्ने सोच त्याग्न अर्याललाई आग्रह गरे।

उनका अनुसार, समय, समाज र मतदाताको सोच ऐतिहासिक रूपमा बदलिएको अवस्थामा पुरानो अहंकारी शैलीले अब स्थान नपाउने स्पष्ट सङ्केत देखिएको छ।