नेपाल यातायात व्यवसायी राष्ट्रिय महासंघले विज्ञप्ति जारी गर्दै इन्धन मूल्यवृद्धिले यातायात क्षेत्रमा प्रत्यक्ष असर परेको भन्दै तत्काल भाडा समायोजन गर्न सरकारसँग माग गरेको छ। महासंघले संघीय रुटको भाडा विभागबाट र प्रदेशअन्तर्गतको भाडा सम्बन्धित प्रदेश सरकारबाट छिटो निर्धारण गर्नुपर्ने बताएको छ।

विभागका एक उच्च अधिकारीका अनुसार केही दिनभित्रै भाडा समायोजन प्रक्रिया टुंग्याउने तयारी भइरहेको छ। “लामो समयदेखि वैज्ञानिक प्रणालीअनुसार भाडा समायोजन हुन सकेको छैन, अब त्यसलाई कार्यान्वयनमा ल्याउने तयारी भइरहेको छ,” उनले बताए।

सरकारले २०६५ सालमै वैज्ञानिक भाडादर समायोजन कार्यविधि लागू गरेको भए पनि १३ सूचकका आधारमा नियमित समायोजन हुन सकेको छैन। उक्त कार्यविधिअनुसार इन्धनको ३५ प्रतिशत र अन्य सञ्चालन लागतका ६५ प्रतिशत आधारमा भाडा निर्धारण गरिनुपर्ने व्यवस्था छ।

यस्तै, इन्धनमा ५ प्रतिशतसम्म मूल्य घटबढ हुँदा स्वचालित रूपमा भाडा समायोजन हुने प्रावधान रहे पनि पछिल्लो १५ महिनायता यो व्यवस्था प्रभावकारी रूपमा लागू हुन सकेको छैन। अन्तिम पटक २०८१ पुस २२ गते भाडादर समायोजन गरिएको थियो।

इन्धन मूल्यवृद्धिसँगै सार्वजनिक सवारी भाडा फेरि बढ्ने संकेत देखिएपछि सर्वसाधारणमा थप आर्थिक भार पर्ने चिन्ता बढेको छ ।