ड्रोन आक्रमणपछि दुबई अन्तर्राष्ट्रिय विमानस्थल अस्थायी रूपमा बन्द

Prime TV News २ हप्ता अगाडि

काठमाडौ । ड्रोन आक्रमणपछि दुबई अन्तर्राष्ट्रिय विमानस्थल अस्थायी रूपमा बन्द गरिएको छ। यात्रु र कर्मचारीको सुरक्षालाई ध्यानमा राख्दै उडानहरू केही समयका लागि स्थगित गरिएको दुबईका अधिकारीहरूले बताएका छन्।

अधिकारीहरूका अनुसार सोमबार भएको ड्रोन आक्रमणबाट विमानस्थल नजिकै रहेको इन्धन ट्याङ्कीमा आगलागी भएको थियो। आगलागी नियन्त्रणका लागि सुरक्षाकर्मी र दमकल टोली परिचालन गरिएको थियो।

घटनापछि विमानस्थल क्षेत्रमा सुरक्षा व्यवस्था कडा पारिएको छ। केही उडानहरू अन्य विमानस्थलतर्फ मोडिएको र यात्रुहरूलाई आफ्नो उडानको अवस्थाबारे सम्बन्धित एयरलाइन्ससँग जानकारी लिन आग्रह गरिएको छ।

दुबई अन्तर्राष्ट्रिय विमानस्थल यात्रु आवागमनका हिसाबले विश्वकै सबैभन्दा व्यस्त विमानस्थलमध्ये एक मानिन्छ। सन् २०२५ मा यहाँबाट झण्डै नौ करोड यात्रुले यात्रा गरेका थिए। फेब्रुअरीको अन्त्यतिर अमेरिका–इजरायल र इरानबीच युद्ध सुरु भएपछि खाडी क्षेत्रमा मिसाइल र ड्रोन आक्रमणका घटनाहरू बढ्दै गएका छन्। त्यसयता खाडीका अरब मुलुकहरूले हजारौँ ड्रोन तथा मिसाइल आक्रमणको सामना गरिरहेका छन्।

यी आक्रमणका लक्ष्यहरूमा अमेरिकी कूटनीतिक नियोग, सैन्य अड्डा, तेल पूर्वाधार, बन्दरगाह, विमानस्थल, होटल तथा आवासीय र कार्यालय भवनहरू समेत पर्ने गरेका छन्। सन् २०२० मा इजरायलसँग कूटनीतिक सम्बन्ध सामान्यीकरण गरेको संयुक्त अरब इमिरेट्समाथि यस्ता आक्रमणको प्रभाव बढी परेको बताइएको छ। साथै खाडी क्षेत्रका अन्य अरब मुलुकहरू पनि यसबाट प्रभावित भएका छन् र उनीहरूले इरानको आलोचना गरेका छन्।