उनले पाँच वर्षअघि नै तत्कालीन नेपाल कम्युनिष्ट पार्टीको उत्कर्ष र पतनबारे आफूले अनुमान गरेको स्मरण गरेका छन्। वाम शक्तिहरू एक ठाउँमा आउँदा जनतामा ठूलो उत्साह देखिए पनि विचार, संगठन र व्यवहारको आधार कमजोर भएकाले एकता टिक्न नसकेको उनको भनाइ छ।

बास्कोटाले लेखेका छन् कि वामपन्थी दलहरू मिल्दा जनतामा अभूतपूर्व आशा जागेको थियो, तर नेतृत्व तहमा देखिएको कार्यशैली र कमजोर आधारका कारण त्यो एकता टिक्न सकेन। उनले सोभियत संघको विघटनबाट पाठ नसिक्नु र चिनियाँ मोडेलको नक्कल गर्न खोज्नु असफल भएको टिप्पणी पनि गरेका छन्।

उनका अनुसार कम्युनिष्ट आन्दोलन पूर्ण रूपमा समाप्त भइसकेको छैन, तर समयमै आत्मसमीक्षा र सुधार नगरे भविष्यमा ठूलो क्षति बेहोर्नुपर्ने अवस्था आउन सक्छ। उनले आगामी चुनाव वा राजनीतिक परिस्थितिमा आन्दोलन नै कमजोर हुन सक्ने संकेत गरेका छन् ।