विशेष महाधिवेशनको औचित्य सकियो : सिटौला

Prime TV News ३ हप्ता अगाडि

काठमाडौ । कृष्णप्रसाद सिटौलाले नेपाली कांग्रेसभित्र विशेष महाधिवेशन बोलाउने विषयलाई आफूहरूले उपयुक्त नठानेको बताएका छन्।

बुधबार सिंहदरबार परिसरमा सञ्चारकर्मीसँग कुरा गर्दै उनले पार्टीको आन्तरिक विवादसँग सम्बन्धित मुद्दा अहिले सर्वोच्च अदालतमा विचाराधीन रहेकाले त्यसलाई छिटो टुङ्ग्याउनुपर्नेमा जोड दिए।

उनका अनुसार अदालतले निर्णय गरेपछि मात्रै पार्टीभित्र देखिएको अन्योल अन्त्य भई आगामी राजनीतिक बाटो तय गर्न सहज हुनेछ। “विशेष महाधिवेशनलाई हामीले अहिले पनि आवश्यक ठानेका छैनौँ। सर्वोच्च अदालतमा रहेको मुद्दा छिट्टै टुङ्गियोस् भन्ने हाम्रो अपेक्षा हो,” उनले भने।

सिटौलाले अदालतको फैसला कस्तो आउँछ भन्ने विषय भने अहिले प्रतिक्षाकै विषय रहेको बताए। अदालतको निर्णयपछि मात्रै पार्टीभित्र थप छलफल गरी एकताबद्ध रूपमा अघि बढ्ने वातावरण बन्ने उनको भनाइ थियो।

यसैबीच उनले पछिल्लो नेपाल प्रतिनिधि सभा निर्वाचनको नतिजा अपेक्षाभन्दा फरक आएको टिप्पणी गरे। उनका अनुसार नेपाली कांग्रेस, नेकपा एमाले लगायतका पुराना दलहरूका लागि परिणाम केही हदसम्म अप्रत्याशित देखिएको छ।

सिटौलाले नयाँ राजनीतिक शक्तिको रूपमा उदाएको राष्ट्रिय स्वतन्त्र पार्टीका सांसदहरूले देश र जनताको हितमा कस्तो भूमिका खेल्छन् भन्ने कुराले आगामी राजनीतिक दिशालाई प्रभाव पार्ने बताए। उनले बदलिँदो राजनीतिक परिस्थितिमा संसद् र विशेषगरी राष्ट्रिय सभाको भूमिका अझ महत्वपूर्ण हुने पनि उल्लेख गरे।