दीपक मनाङे डिल्लीबजार कारागारबाट रिहा
Prime TV News ३ हप्ता अगाडि 
काठमाडौ । गण्डकी प्रदेशका पूर्व सांसद दीपक मनाङे बुधबार डिल्लीबजार कारागारबाट कैद भुक्तान गरी रिहा भएका छन्। उनलाई ज्यान मार्ने उद्योगको दोषी ठहर गर्दै पाँच वर्ष जेल सजाय सुनाइएको थियो।
मनाङेले विसं २०६१ वैशाख ३१ मा चक्रे मिलन भनिने मिलन गुरुङमाथि काठमाडौँको महाराजगन्जमा खुकुरी प्रहार गरेको अभियोगमा फैसला पाएका थिए। उनले पहिले नै दुई वर्ष आठ महिना कैद भुक्तान गरिसकेका थिए भने बाँकी १ वर्ष ४ महिनाको सजाय बुधबार पूरा भएपछि उनी रिहा भएका हुन्।
उच्च अदालत पाटनले पाँच वर्ष कैदको फैसला गरेपछि मनाङे कारागार बाहिर रहेर मुद्दा लड्न सक्ने सुविधा पाएका थिए। त्यसपछि सर्वोच्च अदालतले २०८१ कात्तिक २० गते उच्च अदालतको फैसला सदर गर्दा उनी २०८१ कात्तिक २७ गते पक्राउ परेका थिए। कुल कैदमा उनलाई २० प्रतिशत छुट पनि प्राप्त भएको थियो।
मुद्दामा चक्रे मिलनकी पत्नीले आरोप लगाएकी थिइन् कि मनाङेको समूहले ज्यान लिने उद्देश्यले आक्रमण गर्दा उनका पति मिलन गुरुङको बायाँ हात छिनालिएको थियो। तर मनाङेले घटना भएको समयमा आफू वीरगन्जमा रहेको र त्यहाँको अस्पतालमा उपचार गरेको चिकित्सकको बकपत्र अदालतमा पेश गरेका थिए।
यससँगै पूर्व सांसद मनाङेले आफ्नो कैद भुक्तान पूरा गरेर कानुनी प्रक्रियामा पूर्ववत् स्वतन्त्रता प्राप्त गरेका छन्।
