मतदातालाई निर्धक्क भएर मतदान गर्न कार्यवहाक निर्वाचन आयुक्त भण्डारीको आग्रह

Prime TV News एक महिना अगाडि

काठमाडौ । कार्यवहाक निर्वाचन आयुक्त रामप्रसाद भण्डारीले भोली हुने प्रतिनिधि सभा सदस्य निर्वाचनमा सम्पूर्ण मतदातालाई आफ्नो मताधिकार प्रयोग गर्न आह्वान गरेका छन्।

आयोगले निर्वाचन सञ्चालन र व्यवस्थापनका सबै तयारी पूरा भइसकेको जानकारी दिँदै भण्डारीले मतदातालाई मतदानमा सहभागी हुन आग्रह गरेका हुन्। उनले यस चुनाव नेपालमा संविधान र संघीय लोकतान्त्रिक व्यवस्थालाई अझ सुदृढ बनाउने महत्वपूर्ण अवसर भएको बताए।

भण्डारीले भने, “निर्वाचन स्वच्छ, स्वतन्त्र, निष्पक्ष र भयमुक्त वातावरणमा सम्पन्न गराउन आयोग पूर्ण रूपमा तयार छ। मतदाताको सक्रिय सहभागिताले शासनप्रतिको नागरिक अपनत्व बढाउँछ।”

उनले मतदानलाई मतदाताको अधिकार र कर्तव्य दुवै भएको उल्लेख गर्दै राजनीतिक सचेतना, सामाजिक जिम्मेवारी र नागरिक संलग्नताको उच्चतम अभिव्यक्तिको रूपमा लिनुपर्ने बताए। निर्वाचन व्यवस्थापनमा राजनीतिक दल, उम्मेदवार, नागरिक समाज र सञ्चारमाध्यमले दिएको सहयोगले आयोगलाई थप ऊर्जा र हौसला दिएको पनि भण्डारीले स्पष्ट पारे।

उनले सबै मतदातालाई बिहीबार आफ्ना मतदान केन्द्रमा पुगेर निर्धक्क मतदान गर्न आग्रह गरेका छन्।