अमेरिकाले २४ घण्टामा ५० भन्दा बढी लडाकु विमान मध्यपूर्वतर्फ पठायो

Prime TV News एक महिना अगाडि

काठमाडौ । अमेरिकाले विगत २४ घण्टामा ५० भन्दा बढी लडाकु विमान मध्यपूर्वतर्फ पठाएको छ।

स्वतन्त्र उडान ट्र्याकिङ डेटा र सैन्य उड्डयन अनुगमनकर्ताहरूले एफ-२२, एफ-३५, र एफ-१६ लडाकु विमानहरू मध्यपूर्वतर्फ उडान गरिरहेको देखाएका छन्। यो जानकारी मंगलबार जेनेभामा अमेरिका र इरानबिच दोस्रो चरणको वार्ताका क्रममा प्रकाशमा आएको हो।

आणविक सम्झौतासँग सम्बन्धित मुद्दामा दुई देशहरूबिच मतभेद कायमै छ। यसैबिच अमेरिकाका उपराष्ट्रपति जेडी भान्सले राष्ट्रपति डोनाल्ड ट्रम्पले राखेका सर्त स्वीकार गर्न इरान इच्छुक नदेखिएको बताएका छन्।

फक्स न्युजसँगको अन्तर्वार्तामा भान्सले भनेका छन्, ‘वार्ता केही सकारात्मक भए पनि धेरै प्रमुख मुद्दामा सहमति हुन सकेको छैन।’ यो भनाइले स्पष्ट रूपमा संकेत गर्छ- इरानको आणविक कार्यक्रमसम्बन्धी जारी वार्ता अझै गम्भीर चरणमा छ।

ट्रम्पले पहिले नै भनेका छन्, ‘यदि इरानले हाम्रा माग पूरा गरेन भने अमेरिकाले बल प्रयोग गर्नेछ।’ अमेरिकी लडाकु विमानहरूसँगै मध्य पूर्वतिर धेरैवटा हवाई इन्धन भर्ने ट्यांकर पनि देखिएका छन्, जसले विमान दीर्घकालीन सञ्चालनका लागि तयारी गरिरहेको संकेत गर्छ।

यसैबिच एक अमेरिकी अधिकारीले सञ्चारमाध्यमसँग भनेका छन्, ‘यूएसएस जेराल्ड आर. फोर्ड विमानवाहक स्ट्राइक समूह क्यारिबियनबाट मध्य-एट्लान्टिक पुगेको छ र मध्य पूर्वतिर अगाडि बढ्दै छ। यो अर्को चार देखि पाँच दिनसम्ममा त्यहाँ पुग्ने अनुमान गरिएको छ।’

एपी समाचार एजेन्सीका अनुसार असुरक्षाका कारण नाम नछाप्ने सर्तमा ती अधिकारीले भनेका छन्, ‘फोर्डसँग तीन गाइडेड-मिसाइल विनाशक छन्: यूएसएस महान, यूएसएस बैनब्रिज र यूएसएस विन्स्टन चर्चिल।’

यसअघि यूएसएस अब्राहम लिंकन र अन्य प्रमुख अमेरिकी हवाई तथा नौसेना सामग्री यस वर्षको सुरुमा यस क्षेत्रमा तैनाथ गरिसकिएका छन्। जसले मध्यपूर्वमा अमेरिकाको सैन्य उपस्थितिलाई अझ बलियो बनाएका छन्।