भारतविरुद्धको टी–२० विश्वकप खेल पाकिस्तानले बहिष्कार गर्ने निर्णय

Prime TV News २ महिना अगाडि

काठमाडौ । टी–२० विश्वकप क्रिकेटमा भारतविरुद्ध हुने खेल पाकिस्तानले नखेल्ने निर्णय गरेको छ।

पाकिस्तान सरकारको आधिकारिक एक्स खातामार्फत १५ फेब्रुअरी २०२६ मा तय गरिएको भारत–पाकिस्तान खेलमा राष्ट्रिय टोली मैदानमा नउत्रने घोषणा गरिएको हो।

सरकारले विश्वकपका अन्य खेलका लागि भने पाकिस्तान क्रिकेट टोलीलाई श्रीलंकामा यात्रा गर्न अनुमति दिएको जनाएको छ। तर भारतविरुद्धको खेलबारे स्पष्ट बहिष्कारको निर्णय सार्वजनिक गरिएको छ।

घोषणामा निर्णयको ठोस कारण उल्लेख नगरिए पनि अन्तर्राष्ट्रिय क्रिकेट परिषद् (आईसीसी) ले बंगलादेशलाई विश्वकप खेल्नबाट वञ्चित गरेपछि त्यसको प्रतिक्रियास्वरूप पाकिस्तानले यस्तो कदम चालेको अनुमान गरिएको छ।

पाकिस्तानको यो निर्णयले विश्वकपको तालिका र प्रतियोगिताको निष्पक्षतामाथि गम्भीर प्रश्न उठाएको छ। क्रिकेटजस्तो अन्तर्राष्ट्रिय खेलमा राजनीतिक निर्णय हावी हुनु खेल भावनाका लागि हानिकारक हुने भन्दै क्रिकेट विश्लेषकहरूले आलोचना गरेका छन्।

भारत–पाकिस्तान खेल विश्व क्रिकेटकै सबैभन्दा धेरै प्रतीक्षा गरिने प्रतिस्पर्धामध्ये एक मानिन्छ र यस्तो खेल बहिष्कार हुनु प्रतियोगिताको आकर्षणमै ठुलो धक्का पुग्ने देखिएको छ।