अमेरिकाको इतिहासकै लामो सटडाउन अन्त्य, ट्रम्पले खर्च विधेयकमा गरे हस्ताक्षर
Prime TV News १ हप्ता अगाडि 
काठमाडौ । अमेरिकामा इतिहासकै लामो ४३ दिने ‘सरकारी सटडाउन’ अन्त्य भएको छ।
राष्ट्रपति डोनाल्ड ट्रम्पले बुधबार संघीय खर्च विधेयकमा हस्ताक्षर गरेपछि करिब डेढ महिनादेखि अवरुद्ध सरकारी गतिविधि पुनः सञ्चालनमा आउने भएको हो। सटडाउन तब सुरु भएको थियो जब नयाँ आर्थिक वर्षको सुरुवातसँगै संघीय बजेट समयमै पारित हुन सकेन।
सिनेट र हाउस अफ रिप्रिजेन्टेटिभबीच खर्च विधेयकबारे सहमति नजुट्दा सरकारले सामान्य खर्च गर्न नसकेको हो। यसबीच, करिब ८ लाख संघीय कर्मचारीहरू तलबबिनै घरमा बस्न बाध्य भएका थिए। हवाई सेवा, खाद्य सहायता र अर्थतन्त्रसम्बन्धी तथ्याङ्क प्रकाशनजस्ता महत्वपूर्ण सेवा अवरुद्ध बनेका थिए।
बुधबार राति प्रतिनिधिसभामा भएको मतदानमा विधेयक २२२ मत पक्षमा र २०९ मत विपक्षमा पारित भयो। त्यसपछि राष्ट्रपति ट्रम्पले विधेयकमा हस्ताक्षर गर्दै सटडाउन अन्त्यको घोषणा गरे। यस विधेयकले आगामी जनवरी ३० सम्मका लागि मात्र संघीय खर्च स्वीकृत गरेको छ।
ट्रम्प प्रशासनले भने दीर्घकालीन बजेट सम्झौताका लागि दलहरूबीच थप छलफल आवश्यक भएको बताएको छ। सटडाउन अन्त्यसँगै बिहीबारदेखि अधिकांश संघीय कर्मचारीहरू काममा फर्कने भएका छन्। हवाई उड्डयन, खाद्य सहयोग र सार्वजनिक सेवा क्षेत्र पुनः सक्रिय हुने अपेक्षा गरिएको छ।
साथै, सटडाउनका कारण रोकिएको रोजगारी, मूल्यवृद्धि र उपभोक्ता खर्च सम्बन्धी सरकारी तथ्याङ्क प्रकाशन पनि फेरि सुरु हुने भएको छ।
