विशेष महाधिवेशन तीन महिनाभित्र गर्नुपर्ने आवश्यकता छः महामन्त्री शर्मा

Prime TV News १ हप्ता अगाडि

काठमाडौ । नेपाली कांग्रेसका महामन्त्री विश्वप्रकाश शर्माले पार्टीको विधानअनुसार तीन महिनाभित्र विशेष महाधिवेशन आयोजना गर्नुपर्ने आवश्यकता व्यक्त गरेका छन्।

शर्माले महाधिवेशनका प्रतिनिधिहरूको ५४ प्रतिशतले असोज २९ गते कार्यवाहक सभापति पूर्णबहादुर खड्कालाई विशेष महाधिवेशनको माग गर्दै हस्ताक्षर बुझाएका छन्। यसलाई ध्यानमा राख्दै, विधानको दफा १७(२) अनुसार तीन महिनाभित्र विशेष महाधिवेशन गर्न अनिवार्य छ, उनले बताएका छन्।

महामन्त्री शर्माले सामाजिक सञ्जालमा पोस्ट गर्दै भनेका छन्, “नियमित महाधिवेशनको मिति पुस, माघ, वैशाखमा निश्चित गर्ने मुख्य प्रश्न होइन। विशेष महाधिवेशनको आयोजनासँग सम्बन्धित मुद्दा अहिले प्रमुख कुरा हो। यो पार्टीको विधानअनुसार ९० दिनभित्र अवश्य सम्पन्न गर्नुपर्ने छ।”

उनले थपे, “विशेष महाधिवेशनको मागलाई के नियमित महाधिवेशनले मात्र सम्बोधन गर्न सक्छ? यो कुरा स्पष्ट ढंगले बुझ्न महत्त्वपूर्ण छ। केन्द्रीय समितिमा यस विषयमा गम्भीर छलफल भइरहेको छ र हामी एकता र परिपक्वता सहित छिट्टै निर्णयमा पुग्ने छौं।”

यसअघि, महामन्त्री शर्माले पुस १६ देखि १९ सम्म १५ औं महाधिवेशनको मिति प्रस्ताव गरेका थिए। त्यस आधारमा, महाधिवेशनको कार्यतालिका पेस गर्ने क्रममा पार्टीका नेता गगन थापाले सोही मिति तय गर्ने प्रस्ताव गरेका थिए। तर सभापति शेरबहादुर देउवा पक्षका केही पदाधिकारी र पूर्वपदाधिकारीसँग सहमति नजुट्दा महाधिवेशनको मिति तय हुन सकेको छैन ।