वैकल्पिक विकास वित्त परिचालन विधेयक २०८२ राष्ट्रिय सभामा दर्ता

Prime TV News १ हप्ता अगाडि

काठमाडौ । वैकल्पिक विकास वित्त परिचालन विधेयक २०८२ आज राष्ट्रिय सभामा दर्ता भएको छ। अर्थमन्त्री रामेश्वरप्रसाद खनालले अर्थ मन्त्रालयको तर्फबाट यो विधेयक प्रस्तुत गरेका हुन्।

विधेयकले वैकल्पिक विकास वित्तका स्रोतहरूको परिचालनलाई थप पारदर्शी र व्यवस्थित बनाउनको लागि कानूनी ढाँचा तयार गर्ने उद्देश्य राखेको छ। यस विधेयकको प्रमुख उद्देश्य भनेको सरकारी र निजी क्षेत्रको सहकार्यमा देशको आर्थिक विकासलाई नयाँ गति दिनु हो।

यसअघि, प्रतिनिधिसभा विघटन हुनु अगाडि यो विधेयक संसदमा छलफलका लागि आएको थियो, तर प्रतिनिधिसभा विघटन भएपछि यो निष्क्रिय भएको थियो। अब सरकारले आवश्यक परिमार्जनसहित यस विधेयकलाई पुनः राष्ट्रिय सभामा दर्ता गरेको हो।

अर्थमन्त्री खनालले विधेयक दर्ता गर्ने क्रममा यसका केहि प्रमुख विशेषतासमेत प्रस्तुत गरे। उनले भने, "यो विधेयकले आर्थिक विकासका नयाँ अवसरहरू सिर्जना गर्नेछ, जसबाट रोजगारीको अवसर बढ्नका साथै देशका भौतिक संरचनाहरूको विकासमा पनि महत्वपूर्ण योगदान हुनेछ।"

विधेयकको प्रमुख उद्देश्य विकासका वैकल्पिक स्रोतहरूलाई परिचालित गर्नु र त्यसको अनुगमन प्रक्रियामा सुधार ल्याउनु रहेको छ। यस विधेयकले विशेष गरी निजी क्षेत्रको संलग्नता र परियोजनामा सार्वजनिक र निजी साझेदारीको प्रवर्धनलाई प्राथमिकतामा राखेको छ।