ट्रम्प प्रशासनद्वारा रुसका दुई ठूला तेल कम्पनीमाथि कडा प्रतिबन्ध, युद्धविरामको माग

Prime TV News ४ हप्ता अगाडि

काठमाडौ । अमेरिकाका राष्ट्रपति डोनाल्ड ट्रम्पको प्रशासनले रुसका दुई ठूला तेल कम्पनीहरू रोसनेफ्ट र लुकोइलमाथि आर्थिक प्रतिबन्ध घोषणा गरेको छ। यस कदमलाई वाशिङटनले युक्रेनमा जारी युद्ध अन्त्य गर्न मास्कोमाथि दवाव सिर्जना गर्ने प्रयासका रूपमा लिएको छ।

राष्ट्रपति ट्रम्पले पछिल्ला केही सातादेखि रुसमाथि कडा कदम चाल्ने संकेत दिँदै आएका थिए। तर आजसम्म ठूला दण्डात्मक कदम नचालिएका बेला, यो प्रतिबन्ध अमेरिकी प्रशासनको सबैभन्दा ठूलो आर्थिक प्रतिक्रिया बनेको छ।

अमेरिकी अर्थमन्त्री स्कट बेस्सेन्टले विज्ञप्तिमार्फत भने, “अब हत्या र विनाश रोक्ने समय आएको छ। राष्ट्रपति भ्लादिमिर पुटिनले यो अर्थहीन युद्ध अन्त्य गर्न अस्वीकार गरेकाले, खजाना विभागले क्रेमलिनको युद्ध मशीनलाई आर्थिक रूपमा सहयोग पुर्‍याउने रुसका दुई प्रमुख तेल कम्पनीहरूलाई निशाना बनाएको हो।”

बेस्सेन्टले थपे, “यदि आवश्यक पर्‍यो भने थप कदम चाल्न तयार छौं। राष्ट्रपति ट्रम्पको युद्ध अन्त्य गर्ने प्रयासमा हामी आफ्ना सहयोगी राष्ट्रहरूलाई पनि यी प्रतिबन्धहरूमा सामेल हुन आह्वान गर्छौं।”

प्रतिबन्धले रोसनेफ्ट र लुकोइलसँगै तिनका करिब तीन दर्जन सहायक कम्पनीहरूलाई पनि असर गर्नेछ। यी प्रतिबन्धहरूले रुसको ऊर्जाक्षेत्रमा गम्भीर आर्थिक दबाब सिर्जना गर्ने बताइएको छ, जुन रुसको प्रमुख आम्दानी र सैन्य खर्चको मुख्य स्रोत मानिएको छ ।